Gita

(Geeta scene begins from 11 min and continues till the end of the episode, i.e. - 40 min)



Krishna – Kya dekh rahe ho Parth? 



Arjun – Pita tulya jano, Pitamah, Aacharyo, Bhaiyon, Mitro, aur Putra ko dekh raha hoon Kehsav. 



Krishna – Inhe dekhna kya hai Parth? Tum inhe pehli baar to nahi dekh rahe ho? 


Arjun –Haan, pehli baar to nahi dekh raha hoon. 



Krishna – Aur tum yeh bhi jaante the ki yeh saare sage sammandhi is ranbhoomi mein kisi na kisi ore khade avashya dikhayi denge. 



Arjun – To kya jaanne aur dekhne mein koi antar nahi hai Keshav? He Madhav, aap mere rath dono senao ke beech le chaliye ki mera paridrishya thik rahe. Main dono senayo ko barabar ki doori se dekhna chahta hoon Keshav. Mujhe le chaliye wahan. 




Krishna – Le chalta hoon Parth, le chalta hoon. Parantu he Kuntiputra, yeh baat tumne shankh bajne se pehle kyun nahi kahi? 



Arjun – Kyunki shankh baajne ke upraant ab is yudh ki vishay mein koi sandeh nahi reh gaya Keshav, koi sandeh nahi reh gaya. 



(Here we have reactions of different characters for one minute or so.)



(Now the chariot is in the middle of the battlefield.)




Krishna – Lo Parth, ranbhoomi ka madhya to aa gaya. 



Arjun– Yeh do senaye nahi hai Keshav – yeh to do saagar hai. 


(Here we have some flashback scenes of Arjun's childhood with Bheeshma and Drona) 


Krishna – Inhe kab tak dekhte rahoge Parth? 



Arjun– Dekhne dijiye Keshav, dekhne dijiye. Kya pata is yudh ke upraant in mein se kaun dekhne ko milega aur kaun dekhne ko nahi milega. 

Madhav, main yeh kin logo se yudh karne aaya hoon? Aur is yudh mein vijay prapt karne ke liye mai kin logon ke praan dao pe laga raha hoon? Dono hi ore to ek hi vansh ke log khare hai, ek hi briksh ke daaliya. 

Woh … woh jo saamne shwet vastra pehne shwet rath par sawar khade hai, woh sansar ke liye Gangaputra honge, mere liye to woh sneh ki Ganga hai. Mai apne maile, dhul se sane vastra pehan kar inke shwet vastra mein ghus jaya karta tha. Woh mujhe apne hriday se laga liya karte the, woh mere Pitamah hai Keshav. Woh mere Pitamah hai.

Woh acharya Dron hai, jinhone mere atma ko nehla diya apne gyan ki saagar me. Aur is shishya ki jholi mein apna saara gyan udel diya. Unhone jitna mujhe diya hai na Keshav, utna to swayam apna Putra Ashwatthama ko bhi nahi diya.

Mai in se yudh karne aaya hoon? Mai inke pran lene ki praitna karunga? Yeh sochne se hi mera ang ang shithil hota ja raha hai, mera mooh sukha ja raha hai, dhanush aur vaan pakadne wale yeh haath… sund hue ja rahe hai. Mere sharir mein woh kapkapi hai Keshav jo maine kabhi shishir ritu me bhi anubhav nahi ki thi. Mera Gaandiv… mera Gaandiv mere haath se gira ja raha hai Keshav, main in par vaan kya chalaunga Keshav, jinka satkar ke liye swayam mere romte tak khade ho gaye ho. Main is ranbhoomi kurukshetra ko apne hi vansh ka shamshaan bhoomi nahi bana sakta Keshav, apne hi vansh ka shamshaan bhoomi nahi bana sakta.
Aap kuch kehte kyun nahi Keshav? 


Krishna – Abhi to main sun raha hoon na Parth? Pehle tum keh lo… 



Arjun –Kehne ko kya hai Keshav? Kehne ko kya hai? Mai apni kul ke shavo par apna raaj bhavan khada nahi kar saakta. Mai us raaj-sukh ka kya karunga jisse Bharat-Vansh ki lahu ki mehek aa rahi hogi?Jin guru jano ki charno par sir rakhha, unhi ke sir kaat fenku? Jisse is dhanush par vaan chalana seekha, ussi par vaan chalau Keshav? Mujhe in mulyo par vijay nahi chahiye Keshav, mujhe in mulyo par vijay nahi chahiye. Prithvi ka rajya to phir bhi prithvi ka rajya hai, mujhe in damo Trilok ka rajya bhi nahi chahiye

Duryadhan… Duryodhan bhi hai to mera hi bhai na? Maana ki usne hamare saath kapat kiya hai, usne Panchaali ka apmaan karke poora bharat vansh ka apmaan kiya hai, kintu hai to woh jyeshth Pitashree ka jyeshth putra hi na? 

He Shaantidev, yaadi sab kuch kho kar bhi mujhe shaanti mile, aur main kul ki naash ki paap se bach jaun, to yeh shaanti bahut sasti hai Keshav, yeh shaanti bahut sasti hai. 


Krishna -

Kutastva kasmalamidam visame samupasthitam|
Anaryajustamasvargyamakirtikaramarjuna||2-2||




Arjun – Keshav …


Krishna – Mera naam lekar mujhe pukarne se pehle yeh batao Parth ke is samay jab vinash ke badal charo ore se ubar aaye hai, aur Dharm raksha aur vijay ki aas liye tumhari ore dekh raha hai, is sankat ke ghari mein tumne kayarta ke in heen bhavo ko apne hriday mein aane kaise diya? Sreshth purush to yu vishaad mein dooba nahi karte, Dharm aur Adharm ke beech sangharsh ke is nirnayak ghadi mein napunsak na bano Parth, napunsak na bano. 

He Parantap, He Shatru-sanharak, He Dhananjay, tumhare yeh bhaav anarya hai, yeh tumhe swarg se gira denge. Aur keerti se bhi. Aur tum swayam apne tiraskar ka kaaran ban kar reh jaoge. Is liye He Parth, hriday ki is durbalta ko tyago, aur yudhh ke liye khade ho jao. 





Arjun – Khada kaise ho jau Madhusudan, khara kaise ho jau? 

Pitamah ka vadh karne ke liye khada kaise ho jau? Guru-Sreshth par prahaar karne ke liye khada kaise ho jau? Jo mere liye pujyaniya hai, unse yudhh kaise karu? Jin Guruyon ne mujhe vijay ka mantra sikhaya, unhe parajit karne ke liye kaise khada ho jau? In Mahapurusho par haath uthane se to kahi achha hai ki mai yeh haath, bhiksha ke liye phailau. Bhiksha mein mili hui roti in Mahapurusho ki rakt se sani hui nahi hogi. 

He Hrishikesh, mai to yeh bhi samajh nahi pa raha hoon ki is yudhh mein vijay sreshth hai ki parajay. Dhritarashtra putro shatruyo ke bhaanti mere saamne khade hai, main jaanta hoon ki unka vadh kiye bina jeena sambhav nahi hai, kintu He Keshav, unka vadh karne ke uprant bhi jeena sahaj nahi hoga. Kya woh mere bhai nahi hai Keshav? Boliye Keshav …



Krishna – Avashya hai. 



Arjun– Bus kewal itna hi kehna hai aapko? 


Krishna – Tumne kewal yehi to poocha tha Parth.

Kintu yeh yudhh sammandho aur naato ki sthaapna ya pehchaan ke liye nahi hai Kuntiputra, apne kartavya ko pehchaano aur tab nirnay lo. 

Kyunki nirnay to tumhi ko lena padega. Yadi tum yeh chahte ho ki nirnay main loon aur tum is yudhh ke uttar-dayitwa se bach jao, to yeh nahi hoga Parth, kadapi nahi hoga. Kyunki yeh yudhh bhi tumhara hai, aur is yudhh ka parinaam bhi tumhara hi hoga. 




Arjun – Mujhe kartavyo ka maarg thik tarah se dikhai nahi de raha hai Keshav, is liye He Vaasudev, aap mere aatma ke bhi saarathi ban jaiye. Mai jaanta hoon ki mai Dharm aur Adharm ke beech mein khada hoon, kintu yeh nirnay nahi le pa raha hoon ki Dharm kis ore hai aur Adharm kis ore. Mere maarg darshan kijiye Keshav. Indriyo ko sukha dene wala is shok se bachne ka maarg dikhlaiye mujhe. Apne is maansik avastha me to mai yudhh nahi kar sakta, Govind, mai yudhh nahi kar sakta. 

Na yotsya iti govindam... na yotsya iti govindam.



(Here again we have a conversation between Dhritarashtra and Sanjay). 


Krishna -

Ashochyan anvashohcas tvam prajnavadanshcha bhasase,
Gatasun agatasunsh cha nanushochanti panditah.(11)



Haan Parth, jo chale gaye, we to chale gaye. Aur gyani to na jaane walo ka shok karte hai aur na unka jo nahi gaye. Weh to na bigat ke liye shok kare aur na agat ke liye. Tumhari shaili to gyaniyo ki hi hai, parantu baat tum murkho jaisi kar rahe ho. Shok karne se pehle yeh to dekho ki tum jinke liye shok kar rahe ho, weh to shok ke yogya hi nahi hai. 




Arjun  To kya Pitamah ya Guru-Sreshth Acharya shok ke yogya nahi hai Keshav? 


Krishna – Yedi woh shok ke yogya hote to main yeh kehta hi kyun Parth? 

Tum is satya ko samjh lo Parth ki mool tatwa sharir nahi hai, Aatma hai. Aur mrityu uski yatra ka ant bhi nahi hai. Kyunki uski yatra to anant hai. Mrityu to kewal ek padaav hai Parth, kewal ek padaav. 

Saans ka ant pavan ka anth nahi hai. Yu samjho Parth, ki prani to pehle baalak hota hai, phir woh baalak yuva ho jata hai, phir woh yuva vridhh aur phir mrityu. Kintu yeh yatra to sharir ki hai.

Aatma to isse bhi aage jata hai. Woh ek sharir ko tyag kar koi aur sharir dhaaran kar leta hai. Is liye jo yatra mrityu par samapt ho jaaye Parth, woh yatra to kewal sharir ki yatra hai Parth, kewal sharir ki yatra hai. 



Na jayate mriyate va kadchin nayam bhutva bhavita va na bhuyah,
Ajo nityah shashvatoyam purano na hanyate hanyamane shaarire (20)



Aatma ki yatra to anant hai Parth. Aur uski yatra ki ek bindu par sharir peechhe chhut jata hai aur yatri aagey nikal jata hai. Aur woh bilkul waise hi ek naya sharir pehan leta hai jaise hum koi purana vastra utaarkar naya vastra pehan lete hai. 


Vasansi jeernani yatha vihaya navani grhnati naroparani,
Tatha sharirani vihaya jirnany anyani sanyati navani dehi (22)



He Parth, vinash to Aatma ko chhu hi nahi sakta, to phir shok kaisa? Aur kiske vinash ka? Kya vastra ke vinash ka? Kintu vastra to amar nahi hota. Woh to tyaage jaane ke liye hi hota hai. Aur Aatma marta nahi, kabhi nahi marta. 



Arjun– Kintu we jo saamne khade hai, weh sab in yudhh ke paschaat sab ke sab honge na Keshav, sab ke sab honge na? 


Krishna – Yeh hona aur na hona kya hai Parth? Kyunki wo samnay to kabhi tha hi nahi jab mai nahi tha, ya tum nahi the, ya yeh saare log nahi the. Aur na hi wo samay kabhi hoga, jab mai nahi hounga ya tum nahi hoge ya yeh saare log nahi honge.

To phir tum yeh kis bhram mein padh rahe ho Parth? Ki vartamaan jeevan hi sampoorn jeevan hai? Vartamaan jeevan sampoorna jeevan nahi hai Parth. Hum the bhi, hum hai bhi aur hum honge bhi. 

Ab raha yeh sukh–dukh, inka kya hai? Yeh to rituyo ke bhaanti hai, aate jaate rehte hai. He Kuntiputra, jo sukh aur dukh dono hi ko samaan samjhe aur unse prabhaavit hue bina usse jhel jaye, wohi 'Sthitapragnya' hai. Aur wohi Moksha ka adhikari bhi hai. 




Matrasparshas tu kaunteya shitoshnasukhadukhadah,
Agamapayinohnityas tams titiksava bharata (14)



He Bharat, maarne ya marne ki is aashanka se mukt ho jao. Kyunki mrityu to sirf ussi ki ho sakti hai na jiska janm hua ho, Aatma to Kaalateet hai. Kaal se bhi pare hai. Janm to jeev ka hota hai, Aatma ka nahi. Aur yadi Aatma janm hi nahi leta, to uski mrityu kaise ho sakti hai? Aatma to bus hai Parth, hai. Wo Kaal ke dono tato par bhi hai, aur Kaal ke dhaara me bhi. Wo Ajanma hai, Nitya hai, Sanatan hai, Avikaari hai, Avinaashi hai.

Is liye maarnme ya marne ko leke chintit hona vyarth hai Parth, vyarth hai. Mrityu to kewal sharir ki hoti hai, aur uski mrityu ke pashchat bhi Aatma nahi marta, kyunki shastra usse kaat nahi sakta, agni usse jala nahi sakti, jal usse gila nahi kar sakta, aut vayu usse sukha nahi sakti. 




Nainam chindanti shastraani nainam dahati paavakah,
Na chainam kledayanty apo na shoshayati marutha. (23)




Ab kis chinta mein ho Parth? 



Arjun – He Janaardan, kya mai ek Aatma ko Pitamah kehta hoon?Mai apne dhool mein sane vastra pehan kar kya ek Aatma ki god mein ghus jaya karta tha? Wo jo shwet vastra wale vridhh yodhha saamne apne rath me khade hai, kya kewal woh ek Aatma hai? Kya unke us sharir ne, jisse aap Aatma ka vastra keh rahe hai, anek vaar mere sheesh pe aashirwad dene ke liye haath nahi dhara tha? 

Kya woh vridhh Brahman-Sreshth kewal ek Aatma hai, jinhone mujhe dhanurvidya seekhaye hai?


Keshav, mai Aatma ka Nitya hone, Puratan hone, Avinaashi hone par nahi na karta, par jin shariro ki main baat kar raha hoon, wo sharir bhi to mere kuch lagte hai na? Aatma to janam nahi leta Keshav, Aatma to janam nahi leta, kintu log to janam lete hai Keshav, log to janam lete hai. 


Krishna – Haan, log janam to avashya lete hai. Kintu is tark to tanik aage badhao Mahabaho, tanik aage badhao. Jo janm lega, uske mrityu to nishchit hai, to nishchit ka shok kyun? Janm lene wale ko ek na ek din to marna hi hai. Aur yeh mrityu bhi ant nahi hai. Kyunki marnewala phir janm bhi lega, yeh to ek Atal Satya hai Parth. Aur is Atal Satya ko koi taal bhi nahi sakta, na tum, na mai, na koi aur.

Ganga putra Bheeshma ke paas to ichha mrityu ka vardaan hai, kintu mrityu to phir bhi atal hai na Parth? To janm, mrityu aur phir janm ki is shrinkhala me shok ka sthaan kahan hai Parth? Kahan hai shok ka sthaan?

Jin logon ko tum saamne khada dekh rahe ho na Parth, wo is janm ke pehle bhi the, par kya the yeh tum nahi jaante. Wo is janm ke uprant bhi honge, par kya honge yeh bhi tum nahi jaante. Unka astitva to is janm aur is maran ke do binduyo ke idhaar ya udhaar hai hi nahi. Aur agar hai bhi, to Agyaat hai, Avyakt hai. Arthat is janm se purva bhi wo tumhare liye nahi the Parth, aur is janm ke uprant bhi nahi honge. To he Parth, jinke jeevan ke anivarya ant hi mrityu ho, aur unke jeevan ke is anivarya anth ko na tum taal sakte ho, na hi badal sakte ho, to phir shok kaahe ka? Aur shok kyun?

Yeh Pitamah, yeh Gurujan, yeh sagey sammandhi, in me se kisi ko bhi tum unke is janm se poorv bhi nahi jaante the Paarth, aur na hi is janm ke uprant jaanoge. Tab to phir inke liye shok karna vyarth hoga na Parth, vyarth hoga. 



Avyaktdini bhutani vyaktamadhyani bharata,
Avyaktanidhanany eva tatra ka paridevana (28)





(Again we have Dhritarashtra-Sanjay conversation here for one minute.) 



Now we have one Doha:_

Duvidha me Dhritraashtra hai, yuddh saka nahi rok;
Yogeshwar samajha rahe, Arjun karo na shok, Arjun karo na shok.





Again Geeta scene continues:-


Krishna 

Svadharmam api chavekshya na vikampitum arhasi,
Dharmyad dhi yuddhach chreyonyat kshatriyasya na vidyate (31)


Is me aashcharya ki kya baat hai Parth, jaise phatna vastra ki antim satya thehra hai, waise hi mrityu sharir ka Antim Satya hai. to phir satya ka shok kyun? 

Manushya Sharir aur Aatma, Nashwar aur Anashwar ka milan nahi hai. Sharir to kewal Aatma ka ek Saadhan hai. Is liye sharir ki chinta me pade bina hi, apne Dharm ka paalam karte rehna chahiye Parth.

Kintu agar tum apne Kshatriya Dharm ke baare me soch rahe ho Parth, tab bhi tumhe yudhh hi karna chahiye. Kyunki adharm ke virudhh astra aur shastra uthana hi kshatriya ka Dharm hai. aur aaj Adharm Dharm ke virudhh shastra uthaye saamne khada hai. Is liye he Parth, apne kshatriya Dharm ka paalan karo. 




Arjun– He Keshav, aapse yehi poochne to mai aapko yahan laya hoon, ki mera Kartavya kya hai? Ki mera Dharm kya hai Keshav? 



Krishna – Aur swayam Tum kya ho Parth? Swayam Tum Kaun ho?




Arjun– Mai Dron-shishya Arjun hoon. 



Krishna – Kya iske atirikt aur kuch nahi ho? 




Arjun– Mai Kuntiputra Arjun hoon. 



Krishna – Aur? 




Arjun– Mai Kshatriya hoon. 



Krishna – Yedi tum Kshatriya na rahe hote Parth, to Dron-shishya bhi na rahe hote. Aur he Kauntey, Kuntiputra hone ke naate bhi to tum Kshatriya hi ho. To tumhara teeno hi pehchane kshatriya pehchane hai. Is liye kshatriya Dharm hi tumhara Dharm hai. 

Us Dharm ka paalan karo. Adharm ke virudhh shastra uthana hi Kshatriya Dharm hai, anyay aur aneeti ke virudhh shastra uthana hi kshatriya Dharm hai. Aur yadi is nirnayak ghadi me tumne satya ke paksh me aur asatya ke virodh mein shastra nahi uthaye Parth, to tumhare Dharm ke saath saath tumhare ujjwal keerti bhi nasht ho jayegi. 

Aur agar aisa hua Parth, to kewal tumhara virodhi hi nahi, balki poora samaj tumhe kalankit, kaapurush kahega. Aur aanewale peedhiya tumhe kayar aur paapi maanegi.


Is liye he Mahabaho, vijay ar parajay, jeevan aur mrityu, sukh aur dukh ke prashno me na uljho aur yudhh karo. 

Yadi is yudhh me tumhari vijay hui to prithvi ka rajya aur yash bhogoge. Aur yedi veergati ko prapt hue, tab bhi yash ke saath saath swarg paoge.

Is liye he Kauntey, utho, sukh-dukh , jay-parajay, laabh-haani, sab ko samaan samjho. Aur yudhh karo. Ki yehi tumhara kshatriya Kartavya bhi hai aur Maanav-Dharm bhi. 



Hato va prapsyasi svargam jitva v bhokshyase mahim,
Tasmad uttishtha kaunteya yuddhaya kritanishchayah.(37) 





Last Doha of the Episode :-

Aatma to marta nahi, mar jaati hain deh;
Mann me tum rakkho nahi, duvidha ya sandeh.


(Episode ends here).

Krishna – Is liye He Mahabaho, vijay ar parajay, jeevan aur mrityu, sukh aur dukh ke prashno mein na uljho aur yudhh karo. Yadi is yudhh mein tumhari vijay hui to prithvi ka rajya aur yash bhogoge. Aur yedi veergati ko prapt hue, tab bhi yash ke saath saath swarg paoge.


Is liye He Kauntey utho, sukh-dukh, jay-parajay, laabh-haani, sab ko samaan samjho. Aur yudhh karo. ki yehi tumhara kshatriya kartavya bhi hai aur manav dharm bhi. 



Hato va prapsyasi svargam jitva va bhokshyase mahim,
Tasmad uttishtha kaunteya yuddhaya kritanishchayah.(37) 





Arjun – Mera haath to abh bhi Gaandiv ke ore nahi badh rahe hai Keshav, meri samajh me to ab bhi yeh nahi aa raha hai ki is yudhh se laabh kya hoga? 


Krishna – Laabh? Haani? Yeh dono hi saapeksh shabd hai Dhananjay. Ma jaanta hoon ki tumhe prithvi ki bhog ya swarg ki sukh ki kaamna nahi hai. Is liye he Kauntey –


Sukhadukhe same kritva laabhalaabhau jayaajayau,
Tato yuddhaya yujyasva naivam paapam avyapsyasi (38)




Sukh-dukh, laabh–haani, jay-parajay se upar uthho Parth. 



Arjun – Mujh se to abh bhi nahi utha ja raha hai Keshav. 



Krishna – Ab tak ma tumhe Gyan aur Vivek ki drishti se samjha raha tha Parth, jo jeevan ki aar-paar dekh sakti hai aur satya ki gehrai me jhang kar uski antaraatma ki swar samajh leti hai. Kintu kadachit tum uski amurtata mein ulach gaye. To byavhaarik karm ki tula me is kshan ko tol kar dekho Parth, vyavharik karm ki drishti se apni kartavya ki vishay me nirnay lo. Tab bhi tum isi nirnay par pahochoge ki tumhare liye is yudhh mein bhaag lena aavashyak hai. 



Arjun – Yehi nirnay to ma nahi le pa raha hoon Keshav, nahi le pa raha hoon. 



Krishna – Tum yeh nirnay kewal isi liye nahi le pa rahe ho Parth ki tum is pal ko keval vyaktigat labh aur vyaktigat haani ki tula me tol rahe ho. Yehi to moh ka bandhan hai Parth, yehi to tumhari shok ka jad hai. Aur isi liye tumhara yeh kayar, aur kalank me doobone wala shok na tumhare heet mein hai aur na hi samaj ke heet mein. Yeh shok na vartamaan ke liye shubh hai aur na hi bhavishya ke liye. Laabh aur haani ki is kaamna me na bhatko Parth, na bhatko. Keval Karnm karo, Karm. Karm to apne aap mein punya hai, Pavitra hai aur samaj ke liye Kalyakari bhi hai. Karm to swayam hi apna phal bhi hai Parth, parantu yadi tum samaj kalyan ki karya me swayam apna heet mila loge to tumhara woh Karm ashudh aur ashubh ho jayega. Is liye He Parth, Nishkaam Karm ki maarg par chalo. Kyunki karm phal to tumhare vash mein hai hi nahi. Is liye kewal Karm karo aur karm phal ki ichha na karo. 


Karmany eva dhikaaras te ma phaleshu kadaachana,
Ma karmaphalahetur bhur maate sangohastv akarmani. (47) 





Arjun – Kintu nishkaam karm kaise sambhav hai Vaasudev? Phal ka gyan hi to karm karwata hai. Aur yadi drisht phla se hi hat jaye to koi karm karega hi kyun? 



Krishna – Koi karm is liye karega Parth ki karm ke bina to jeevan sambhav hi nahi. Kuch to karoge hi, ya bhojan karoge ya nahi karoge. Ya bhookhe ko bhojan karvaoge ya nahi karvaoge. Ya yudhh karoge ya nahi karoge. Tumhare paas to kewal yehi vikalp hai ki tum kya karo ya kya na karo.

Parantu parinam tumhare vash mein nahi hai Parth, karm phal tumhare vash mein nahi hai. Tumhare adhikaro ki seema is vikalp par aake samapt ho jaati hai ki tum yudhh karoge ya nahi karoge. Kintu yudhh ka parinaam tumhare haath mein nahi hai. Yadi tum vijay chaho bhi, to yeh avashyak nahi ki vijay tumhare hi ho jaye. Tumhari parajay bhi ho sakti hai. kintu yadi tum vijay se mohit nahi hoge, to parajay se bhi nahi ghabraoge. Yedi tum yeh socho Parth, ki chahe vijay ho chahe parajay, kintu tum to kewal is liye yudhh kar rahe ho ki yudhh karna tumhara kartavya hai to vijay ki sukh ya parajay ki dukh ka prashn nahi uthta. 


Aur jo na vijay se sukhi ho aur na parajay se dukhi, wohi Sthitapragnya hai. Is liye He Parth, karm ki pratiphal ki cheshta na karo. Tum to kewal wohi karo jo tumhare vash mein hai. Arthat apne Dharm ka paalan karo. Yehi karmyog hai Parth, yehi karmayog hai. Is rahasya ko samjho Parth ki tumhare paas to kewal karne ya na karne ka vikalp hai. Kintu karm ki ant par manushyo ki adhikaron ki seema samapt ho jaati hai. Karm ka parinaam manushya ki vash mein nahi hai. tum sarvasreshth dhanurdhar ho, parantu yadi tumhara aankhe tanik bhi idhar se udhaar ho jaye, to tum chuk jaoge. Tumhara adhikar tumhara vaan sandhan par hai, tumhara adhikaar tumhari drishti par hai, parantru us mrig par tumhara koi adhikaar nahi jiski ore tum vaan chala rahe ho. He Dhananjay, sadpurush kabhi apni adhikaron ki seema ka ullanghan nahi karte. Arthat apne karm mein sthir raho Parth, sthir raho. Kyunki karm ki kushalta ka hi naam yog hai. 




Arjun – Aur yog kya hai Keshav? Yog kya hai? 



Krishna – Wohi to bata raha tha Parth, yog karm ka kaushal hai. Moh ka tyaag karm ka kaushal hai, moh se mukt ho kar apne kartavyo ka palan karna karm ka kaushal hai, safalta aur asafalta dono hi mein samaan rehna karm ka kaushal hai. 


Buddhiyukto jahaatiha ubhe sukritadushkrite,
Tasmad yogaya yujyasva yogah karmasu kaushalam (50) 





(Here we have conversation between Dhritarashtra and Sanjay for nearly one minute)

(Again Geeta scene continues...)



Arjun – He Keshav, kintu main Muni aur Sthitapragnya ko pehchanunga kaise? Uska pehchaan kya ha? Woh uthta baithta kaise hai? Uski bolne ki shaili kaisi hai Keshav? 



Krishna – Usse pehchanne mein to koi kathinai hi nahi hai Parth! 


Prajahati yada kaman sarvan partha manogatan,
Atmany evatmana tushtah sthitaprajnas tadoh chyate (55) 





Ussi ki bhaanti tum apni kaamnaye tyag do. Apni byaktigat abhilashayo se mukt ho jao. sukh-dukh se pare ho kar apne swayam mein santusht ho jao Parth, to na tumhe dukh ki agni jala sakegi aur na sukh ki varsha tumhe bheega sakegi. He Parth, Sthitapragnya wo Muni hai jo sukh aur dukh dono hi mein samaan bhaav rakhta hai. Aur koi uska yeh santulan tod bhi nahi sakta. Jab uske shabd bahar niakalte hai to mann mein tairte sukh aur dukh se bahar nahi nikalte. Balki atma ki athai gehraiyon se bahar nikalte hai. Wo moh ki bhasha nahi bolta, wo nishkaam karm ki bhasha bolta hai. Wo jab baithta hai to kachhuye ke bhaanti apne bheetar simatkar baithta hai. Aur apne swayam hi ko durg bana leta hai. Arthat uski indriya uske vash mein hoti hai. aur apni indriyo ko kewal wohi apne vash mein kar sakta hai, jiska apna mann apne vash mein ho. He Parth 


Dhyayato vishyan punsam sangas teshu pajaayate,
Sangat samjayate kaamah kaamat krodhoh bhijayaate (62)

Krodhad bhavati sammohah sammohat smritibibhramah,
Smritivranshad buddninaasho buddinaashat pranashyati (63) 



He Parth, samanya purush, vishayo ka dhyan karta hai. Aur vishayo ka dhyaan usse asakt bana deta hai. Is asakti ya lagav se kaam ka janm hota hai. Jab kaam ki purti nahi hoti to krodh utpann hota hai. Jab krodh utpann hota hai to vishay ke prati moh aur badh jata hai. Aur jab moh aur badh jata hai Parth to sochne ki shakti bhatak jaati hai. Jab sochne ki shakti bhatakjk jaati hai to budhhi ka naash hota hai. Aur jab budhhi ka naash hota hai to manushyo ka sarvnaash ho jata hai. Aur He Kuntiputra, tumhara yeh moh tumhe budhhi ki vinash ki ore le ja raha hai. Tanik socho Parth, ki jiske paas budhhi hi na hogi, usse shaanti kaise mil sakti ha? Wo to shaanti aur ashaanti mein antar hi nahi kar sakta. Aur jo shaanti ko ashaanti se alag tak nahi kar sakta, woh bhala kaise sukhi ho sakta hai? 


He Parth, jaise pavan ke jhonke nav ko bhatka dete hai, waise hi kaamnaye budhhi ko bhatka deti hai. 



Indriyanaam hi charatam yan manoh anuvidhiyate,
Tad asya harati prajnam vaayur navam ivambhasi.(67) 




Is liye He Mahabaho, apne indriyo ko apne vash mein rakhho. Swayam hi unke vash mein na ho jao. Parth, yeh baat dhyaan se suno aur samjho – ki jab sansar sota hai, tab muni jaagta hai, aur jab sansar jaagta hai tab muni sota hai. 



Arjun – yeh sona jaagna kya hai Keshav? Yeh raat-din kaise hai? 



Krishna - Raat-din ki to maine baat hi nahi ki Parth, maine to kewal sone aur jaagne ki vishay mein baat ki thi. Samanya purush ki jag(?) har kshan kuch paane aur bhogne ki moh mein byatit hoti hai. Yehi uski chetna ka laksh hai. Yadi usse bhukh lagi to usse bhojan chahiye, yadi usse pyaas lagi to usse jal chahiye. Yadi usse rituyon se apna bachav karna hai to ghar chahiye, uski soch aatmanishth hai. Parantu muni arthat Sthitapragnya ki soch vastunishth hai. Wo byaktigat bhookh aur byaktigat trishna se pare dekhta hai. Wo briksh se gire phal ki baare mein nahi sochta, wo briksh ki baare mein sochta hai. Vano ki baare mein sochta hai. Samanya manushya ko indhan ke liye lakdi chahiye, to woh vriksho ko tabtak kaatta chala jayega jab tak vann nashth na ho jaye. Parantu Muni, prakriti me vano ki mahatva ki baare me sochta hai. Prakriti ke santulan ki vishay mein sochta hai. Vano aur rituyo ke sammandh ke vishay mein sochta hai. Is liye He Parth, jo samanya purush ki indriyo ke liye din hai, wo muni ke liye raat hai, kyunki wo to indriyo ki seema ko paar kar chuka hai. Aur jo samanya purush ki indriya ke liye raat hai, wo muni ke liye din hai. Kyunki ussi sannate me muni ki chetna ka suryoday hota hai. Muni ki ruchi saamne ki samasyayon ke saath saath un samasyayon ke samadhan par bhi hai. Aur yehi usse samanya purush se alag karti hai Parth. 


Ya nisha sarvabhutanam tasyam jaagarti sanyami,
Yasyam jaagrati bhutaani sa nisha pashyato muneh.(69) 




He Parth, Satya indriyo ki pahoch se bahar hai. Aisa nahi ki Muni ko bhookh nahi lagti, lagti hai. Parantu wo apne bhookh ke pare dekhta hai. Aur yeh sochta hai ki bhookh ka upchaar kya hai? Isi liye samanya manushya ka din muni ke liye raat hai. Aur jo samanya manushyo ki is raat se apne aap ko bachale, wohi Sthitapragnya hai. 


Samanya manushya to un nadiyo ke bhaanti hai, jinhe byakulta baha le jaati hai. Parantu unhe apna maarg ka gyan nahi hota. wo to andhadhund beh jaati hai, kyunki wo kewal behne hi ko apna Karm samajhti hai. aur wo apna sara jal, apna saara uthal puthal saagar mein udel deti hai. Kintu saagar phir bhi apne tato ki maryada ka ullanghan nahi karta. Isi prakar kaamnayo ki nadiya samanya manushyo ko to baha le jaati hai, parantu jab woh Muni tak aati hai, tab Muni unhe samet leta hai. Aur apne maryada ka ullanghan nahi karta. He Parth, tum bhi Saagar bano, Saagar Muni hai. Saagar Gyani hai. Tum bhi Gyani bano Parth. Kyunki Gyan hi uttam hai. 




Arjun – He Hrishikesh, He Yogeshwar, He Gyanmurti ! Yadi Gyan Karm se uttam hai to aap mujhe is lahuluhan Karm me kyun laga rahe hai Keshav? Aap mujhe is lahuluhan karm me kyun laga rahe hai?

He Keshav aapne to mujhe uljha diya. Yadi Gyan Karm se uttam hai, to phir mai yeh bhayanak Karm karun kyun? Kyun yudhh karun Keshav? Kyun na Muni ban kar maun samadhi mein chala jaun?Main kalyan ka maarg puch raha hoon Keshav, kripaya mujhe maarg dikhlaiye Keshav, mujhe marg dikhlaiye. 




Krishna– 


Lokehasmin dvividha nishtha pura prokta mayanagha,
Jnanayogena sankhyanaam karmayogena yoginaam (3) 



He nishpaap Arjun, sansar mein do prakaar ke log hote hain – Antarmukhi aur Bahirmukhi. Jo Antarmukhi hote hai, woh swayam ke bheetar jaakar ishwar ko dekhte hain. Yehi Gyan-Yog hai. Aur jo Bahirmukhi hote hai woh swayam se bahar nikalkar usse prapt karne ki kaushish karte hai. Kintu karm se chutkara nahi. Kyunki swayam ke bheetar ja kar usse khojna bhi to karm hi hai. He Kuntiputra, maarg to yehi do hai. Ek 'Gyan-Yog' ka, aur doosra 'Karm-Yog' ka. 



Arjun – He Keshav, to phir main Gyan-Yog ke hi maarg par hi kyun na chalu? 



Krishna – Kintu He Parth, Gyan-Yog bhi karm ke tyaagne ka maarg nahi hai. Siddhi ka maarg nahi hai. Kyunki karm ke bina to zindegi sambhav hi nahi. Aankhe hai to woh avashya dekhengi, palke hai to woh avashya jhapkengi. karn hai to woh avashya sunenge. Jo karmendriayo ke aarey aaye, jo unhe bal poorvak rok kar, unka daman kar kar vishayo ka chintan kare, wo Yogi nahi, wo Gyani nahi, wo to Mithyachari hai. 


Sidhh purush indriyo ko apne vash mein karta hai, unka daman nahi karta Parth. Wo aankhe bandh karke nahi jeeta. Karm bina to sharir ki yatra sambhav hi nahi. Vyakti saans to lega hi na Parth? Yadi vatavaran mein koi sugandh ya durgandh hai, to wo uska bhi anubhav karne ke liye bhi bivash hai. Yadi uske aas paas koi naad hai, koi dhvani hai, koi kolahal hai, to usse sunne ke liye uske kaan uske aadesh ke prateeksha to nahi karenge na? Is liye jo apne indriyo ko niyantrit rakhhe, jo un par apni chetna ka ankush laga kar unhe karmonmukh kare, unhe karm ki disha dikhaye, wohi Shreshth hai.

Wo apne vikalpo ko samajhta hai Parth, aur apne sankalp shakti ka prayog karta hai. Aur He Parth, apne niyat karm karna kuch na karne se achha hai. Ab yeh bhi thik hai Parth ki aankhen dekhti hai, kintu wo kya dekhe aur kya na dekhe, iska nirnay to Gyani swayam hi leta hai. Wo aankho ko dekhne ki, karno ko sunne ki, pao ko chalne ki khuli chhut nahi deta. Vikalp ki isi mode par Gyani aur Agyani ka antar ka bhed khulta hai Parth. Is liye karm to avashyak hai, kyunki uske bina to sharir ka nirvaah sambhav hi nahi. Kintu He Parth, Gyani purush ke bhaanti karm karo, gyani purush ke bhaanti. 



Niyatam kuru karma tvam karma jyayo hya akarmanah,
Sharirayatrapi cha te na prasidhyed akarmanah.(8)


Yajnarthat karmano hanyatra loko hayam karmabhandhanah,
Tadartham karma kaunteya muktasangah samachara (9) 




He Kauntey, Karm aise karo jaise Yagna kiya jata hai. Kyunki Karm hi Yagna hai, aur iska srota Swayam Avinashi Brahma hai. Is liye karm ka maarg seedha Brahma tak jaata hai. Aur isi liye jo Vyakti srishti-charka chalane mein yogdaan nahi karta, uska jeevan mulyaheen ho jata hai. Tum is mulyaheenta ki ore na jao Parth, tum is mulyaheenta ki ore na jao. Jo byakti keval apne hi samasyayo ke bishay me sochta hai, woh to Paapi hai. Is liye tum is mohjaal se nikalke apne kartavyo ko pehchaano Parth, aur unka paalan karo. He Parth, karm phal ki ichha hi marg me badha hai. Karm phal ki ichha hi to Vyakti ki gale mein bandha hua woh pathhar hai jo usse swayam ki pahunyo(?) se upar uthne hi nahi deta. Yehi to byakti ko samaj se kaat deta hai aur usse Vyaktigat laabh aur byaktigat haani ki daldal mein dhakel deta hai. 


Samaj tum mein nahi hai Parth, tum samaj mein ho. Is liye Lok-Sangrah aur Lok-Kalyan ko hi apna param kartavya mano. Kyunki jo samaj ke liye kalyankari hoga wohi tumhare liye bhi kalyankari hoga. Jo karm Lok-Sangrah ke liye hoga Parth, ussi ke dwara tumhe sidhhi prapt hogi. Vyaktigat laabh se to paap ki gali nikalti hai. Kyunki wo to swarth sidhhi ke liye Vyakti ko bhatka deti hai. 



Aur He Parth, yeh bhi na bhulo ki tum ek mahan purush ho. Aur log tumhe drishtant maankar tumhare peeche peeche kaam aur swarth ki path par chal padenge. Kyunki ek shresth Vyakti ka acharan to doosro ke liye drishtant ban hi jata hai. Mujhi ko lo 



Na me paarthasti Kartavyam trishu lokeshu Kinchana,
Na navyaptam avyatavyam varta eva cha Karmani (22) 




Trilok me mere liye kuch karna avashyak nahi Parth, aur trilok me aisa bhi kuch nahi jisse main prapt karna chahu aur prapt na kar sakun. Phir bhi main tumhare saamne hoon, Karm kar raha hoon Parth, Karm kar raha hoon. Yeh dikhla raha hoon, yeh sidhh kar raha hoon ki nishkaam karm ki maarg par chalte hue jeevan Vyateet karna sambhav hai. 



(Again we have Dhritarashtra-Sanjay conversation for two minutes) 


(Now Geeta scene continues…)



Krishna –


Saktah karmany avidvyamso yatha kurvanti bhaarata,
Kuryaad vidvyams tatha ashaktas chikirshur lokasangraham (25) 




Hey Bharat, Karm to agyani bhi karte hain. parantu keval apni 'nihit swarth' ki drishti se. Gyani ka karm to 'Niswarth' hota hai. Sansar ke santulan ko sthir banaye rakhne ke liye hota hai. Lok-Kalyan ke liye hota hai. Is liye He Parth, apne mann par koi bojh na lo, apna karm mujhe arpan kar do aur yeh Dharm Yudhh karo. Kartavya paalan ke marg par to mrityu bhi kalyankaari ho jaati hai. Yadi Pitamah, Gurujano aur sagey sammandhiyo ka tumhe vadh bhi karna pade, tab bhi tumhe paap nahi lagega. Kyunki kartavya paalan paap-rahit hota hai Parth. Kartavya paalan paap-rahit hota hai. Yedi weh veergati ko prapt hue to unki mrityu kalyankari ho jayegi. Aur yadi tum veergati ko prapt hue, to tumhari mrityu bhi. Is liye Parth, yudhh karo, kyunki Dharm ka maarg paap ka maarg nahi ho sakta. 




Arjun – Paap ki baat nikal aayi hai to yeh bataiye Keshav ki kabhi kabhi manushya paap karne ke liye itna vivash kyun ho jata hai? usse kaun vivash karta hai? 



Krishna – usse vivash karti hai uski Vaasna. usse vivash karta hai uska Nihit Swarth. Usse paap karwata hai uska Krodh, uska Moh. In shatruyo ko pehchano Parth. Jaise dhuan agni ko dhak deta hai ya dhul darpan ko ya jhilli garv ko waise hi Gyan ko dhak dete hai Kaam, Moh aur Vaasna. 


Aavritam jnanam etena jnyanino nityavairina,
Kaamarupena kaunteya dushpurena nalena cha (39)


Tasmat tvam indriyany adau niyamya bhaaratvarshava,
Paapmaanam prajahi hyenam jnanavijnananashanam (41) 




Kaam aur Moh ki agni Gyan ko nasht kar deti hai. Aur isi liye Gyani ki Vairi hai. He Kauntey, agni ko swachh banao. Darpan ko parishuddh karo. Aur apne indriyo ko soumya(?) banakar Gyan aur Vivek ke in nashako ka vadh karo. 


Indriyani parany ahur indriyebhyah param manah,
Manasas tu para buddhir yo buddheh paratas tu sah. (42) 



Hey Parth, jad padarth se Indriya sreshth hai, aur Indriyo se sreshth hai Mann, Mann se sreshthtar hai Budhhi, aur Budhhi se bhi sreshth hai Aatma. Tum Aatma ki chinta karo Parth, Aatma ki chinta karo. Aur Deh, Indriyo, Mann aur Budhhi se upar uthne ka prayatna karo. 


He Parth, tum to mere bhakt bhi ho aur mere mitra bhi. Is liye main tumhe wo yog batane ja raha hoon, jo bahut samay se loopt hai. Parantu srishti ke aarambh me isse maine hi surya ko diya tha. aur surya se yeh manu ko mila, aur manu se ikshwaku tak pahocha. 





Arjun- Soorya ko diya tha!! Aapne yeh yog Soorya ko diya tha? Parantu He Keshav, aapne aadhunik kaal me janm liya hai. Aur Sooryadev praacheen hain. To mai yeh kaise maan lun ke srishti ke aarambh me hi, aapne yeh yog Sooryadev ko diya hoga. Boliye Keshav. 



Krishna-



Bahuni me vyattani, janmaani chaarjun,
Taanyaham ved saevaani, na tvam vetth paramptap.(5) 


Paarth, mere aur tumhare bahut se janm ho chuke hain. Mujhe woh saare janm yaad hain, aur tumhe koi bhi janm yaad nahi. 

Hey Paramtap, waise to mai Ajanma hoon, Avinaashi hoon, aur samast praaniyon ka Swami hoon, parantu mai apni prakriti ko adheen karke apni hi Yog Maya se Prakat hota rehta hoon. 




Yada yada hi dharmasya, glanir bhavati bharata, 
Abhiyuthanam adharmasya, tadatmanam srijanyaham.(7)

Paritranay sadhu naam, vinaashaay ch dushtkrittam, 
Dharm sansthapna aarthay, sambhavami yuge yuge. (8)


Haan Paarth, mai prakat hota hoon, mai aata hoon. Jab jab Dharm ki haani hoti hai tab tab mai aata hoon. Jab jab adharm badhta hai hai tab tab mai aata hoon.

Sajjan logon ki raksha ke liye mai aata hoon, dushton ka vinaash karne ke liye mai aata hoon, Dharm ki sthapna ke liye mai aata hoon, aur yug yug me janm leta hoon. 




Arjun- Kintu Keshav! Dharm ki haani hoti hee kyon hai



Krishna- Dharm ki hani isliye hoti hai Paarth ke manushya moh ke bandhan ko nahin tod paata, ke vo apne swayam se naaata todkar samaaj se naata nahin jod pata. Hey Paarth! Yadi aisa na hua hota to Lakshyagriha durghatana na hui hoti, Droupadi vastraharan naa hua hota aur Kourav aur Pandav senae yun aj ek doosre ke saamne nahin khadi hoti. 



Arjun- To kya Droupadi vastraharan par mujhe krodh nahin aana chahiye tha Keshav? 




Krishna- Ye nirnay to swayam tumhe lena hai Paarth. Kintu Droupadi vastraharan keval tumhari vyaktigat samasya nahin hai Paarth. Jo samaaj Indraprasth ki patraani, mahaaraaj Drupad ki putri, aur Paandavon ki patni Draupadi ke vastraharan par choop reh gaya, woh samaaj bhala kisi saadhaaran naari ke maan sammaan ki kya raksha karega? Draupadi vastraharan ek saamaajik samasyaa hai Paarth, ek saamaajik samasyaa hai. Aur yeh tumhara kartavya hai ki tum un shaktion ko nasht karne ke liye yuddh karo, jo kisi Draupadi ka vastraharan kar sakti hain. Yeh shaktiyan samaaj ki shatru hain Paarth. Aur jo mahaapurush is yuddh me, un shaktiyon ke paksh me hain, unke paksh me yuddh karne aaye hain, unke saath yuddh karne me sankoch na karo. Apne vyaktigat moh aur vyaktigat krodh ke bandhano se mukt ho kar, lok-kalyan ke liye yuddh karo Paarth. Yahi tumhara param kartavya hai. Mujhe dekho Paarth. 

Is samaaj aur uske varnon ko, gunon aur karmo ke aadhaar par maine rach to diya; parantu is samaaj rachnaa ka phal maine kabhi nahi chaahaa. Isiliye kartaa hote hue bhi mai akartaa hun. Aur jo is rahasya ko samjhe Paarth, woh kabhi apne karmo me lipt nahi hoga. 




Na maam katmaani limpanti, na me karmaphale spruha,
Iti maam yobhijaanaati, karmbhirna sa badhyate.(14) 



Mujhe karmphal ki ichchha nahi hai. Jabhi to karmphal mujhe dooshit nahi kar paate. Tum bhi nishkaam karm karo Paarth. Aur apne karm par, apne nihit swaarth ki chhaayaa na padne do. 

He Bharat! Karm, akarm aur vikarm ke antar ko samjho. 




Arjun- Aur Karm, Akarm aur Vikarm me kya antar hai Keshav? 



Krishna- Karm to karm hai hi. Kintu jo karm, karmphal ki aasha se mukt ho kar kiya jaay woh akarm hai. Aur jo karm, vyakti aur samaaj ke hit me na ho woh vikarm hai, nishuddh hai. Karm akarm se shreshth hai. Karta akarta se shreshth hai. Aur he Paarth. Jo akarta hai, jo karmphal ki ichchha se mukt hai, wohi gnyaani hai, wahi buddhimaan hai aur wahi karmyogi hai. Uske liye uska karm hi karmphal bhi ha. Aur unke paalan ke uparaant, karmphal ki pratiksha me nahi theherta balki doosre karmo ki aur badh jaata hai. Uske gnyaan ki agni krodh, moh, lobh, dwesh, aakaanksha, haani, sukh aur dukh ke meil ko jala kar uske karm ko shuddh kar deti hai; aur uska karm akarm ban jaata hai. Aur wo karta se akarta ban jaata hai. Aur woh akarta, woh gnyaani, apne liye jeevan me aavashyak saadhan jootane ke atirikt aur kuchh nahi karta. Uske shesh karm, samaaj kalyan ke liye hote hain. Yeh manushya, karm karte hue bhi paap se dushit nahi hota. Uska jeevan to swayam hi samaaj ke liye kalyankari ho jata hai. He nishpaap Arjun, aise hi vyakti ka jeevan Yagya hai. Tum bhi apne jeevan ko yagya bana do; aur uske havan kund me apne karmphal ki ichchha, moh aur krodh ko aahution ki bhaanti jalaa daalo. 




Arjun- Aur, Yagya kya hai Keshav? 



Krishna- Alag alag log, yagya ki paribhaasha bhi alag alag karte hain Parth. Kuchh logon ke liye yagya Brahma ka swaroop hai. Unke liye sabkuchh Brahm hai. Kuchh log devtaaon ko prasann karne ke liye yagya karte hain. To unke liye pooja hi yagya hai. Kuchh saadhak, aatma ko paramaatma se milaane ki saadhna ko yagya kehte hain. Inhi yagyon ki bhaanti, inme di jaanevali aahutiyan bhi alag alag prakaar ki hain. Koi dhan ki aahuti deta hai, to koi karm ki. Kintu vaastav me, yagya chaar prakaar ke hain.

Pehela 'Dravya yagya' hai. Inme arjit dravya aur dhan ko samaaj kalyaan ke kaaryon me lagaaya jaata hai. Arthaat, yeh lokseva yagya hai.

Doosra 'Tapo yagya' hai. Jab koi apne karm ko apni tapasya bana leta hai, to uska jeevan 'Tapo yagya' ban jata hai. He Parth, apne dharm ka paalan bhi yagya hai. Kintu yeh dharm, saampradaayik nahi, sanaatan hai. Yeh vyakti aur samaaj, dono hi ke liye kalyaankaari hain.

Teesra yagya 'Yog yagya' hai. Isme 'Ashtaang yog' ki saadhna ki jaati hai. Aur isme log dhyaan, aur samaadhi ka maarg avalamb karte hain. Praanon ka praanon me havan kiya jaata hai.

Choutha yagya hai 'Gnyaan yagya'. Yun to Parth, chaaron hi yagya mahatvapurn hai, parantu shreshthtam hai, gnyaan yagya. Kyunki Gnyaan hi to achchhe aur bure me antar karta hai. Aur apni agni me tapa kar, karm ko shuddh karta hai aur shubh banata hai. Gnyaan hi to karm ke utkarsh ka charam bindu hai. Aur Gnyaan hi to tumhe, moh bandhano se mukt karaayega Parth. He Parth! Paap ke saagar ko keval, Gnyaan ki nauka hi paar kar sakti hai. 



The last Doha of the Episode:-

Karm karo tum gnyaan se, shresth gnyaan hai dharm;
Karmyog hi dharm hai, dharmyog hi karm. 

Krishna-

Api chedasi paapebhyah sarvebhyah paap krittamah,
Sarvamgnyaanaplavenaiv vrujinam santarishyasi.(36). 





To tum bhi Gnyaan ki nauka me baith kar, paap ke saagar ko paar kar jaao. Yeh samajh lo Parth, ke jaise agni sabkuchh jalaakar bhasm kar deti hai, waise hi Gnyaan ki agni, karmphal ki Ichchha, phal ki praapti na hone par aanevale Krodh, aur us krodh ke sahaare aage badhnevale Moh ko jalakar Bhasm kar deti hai. 



He Parth! Is mantra ko sadaiv yaad rakho ki sansaar me Gnyaan ke samaan pavitra karnevali, naahi koi vastu hai, aur naa hi koi tatva. Gnyaan hi sarvottam hai. 




Agnyash cha ashraddhaanash cha, sanshayaatma vinashyati,
Na ayam lokosti n paro, n sukham sanshayaatmanah.(40). 





Jo agyani hai, jinme shraddha bhav nahin hai, jo baat-baat par shanka karte hai, sanshay yukta hain, ve to nashta ho hee jaate hain aur unhe na is lok me sukh milta hai, aur na hee parlok men. 


Isliye He Bharat! Sanshay ko tyago aur tumhare bheetar jo Muni baitha hai, use jagao. Gyanyogi bano Parth! Gyanyogi bano. Aur samajh lo ki Gyan ki charamseema hee, Karma-sanyas hai. 





Arjun- Aap Karm-sanyaas aur Karmyog dono hee ki prashansa kaise kar sakte hai Keshav? 




Krishna- (Rahasyamyee laugh  ) Ye dono ek doosre ko kaatate nahin bandhu! Aur kalyankari to ye dono hee hai. Kintu in dono me shreshtha hai- Karmyog. 




Arjun- Vo kyu? Aur vo kaise? 




Krishna- Jo Dvesh aur Akanksha se oopar oothkar kaam karta hai, vo to nitya sanyasi hai hee aur vo Dvandvo se rahit hokar, sansarik bandhano se mukta ho jaata hai. 



Isliye jo Karm sanyas ko Karmyog se alag samajhata hai, vo to moorkh hai hee, Gyani aisa kabhi nahin samajhate.


Karm tyag to vaastav me, Nihit Swarth ke tyag ka naam hai Paarth. 

Isliye Karmyog ke bina Karm sanyas ki prapti ho hi nahi sakti. 



Karmyogi ko tatvo ka gyan hota hai aur uska dekhna na dekhna, sunana na sunana,chakhna na chakhna, jaagna na jaagna, lena na lena, chhodna na chhodna aur uska har karm lok kalyan ke liye hota hai.


Aur iseeliye vo pap se bilkul vaise hee alag rahta hai jaise kamal jal men rahkar bhi, jal se alag rahta hai. 



Brahmnyadhaykarmani, sagantyaktvakarot yah,
Lipyyate na sa paapena, padmapatramivambhasa. 





Hey Dhananjay! Karmyogi karmphal ko tyag kar, param shakti ko prapt hota hai aur nau dwaron wale sharir roopi ghar me sukhi raheta hai. 




(Then the elaboration of above verse by Sanjay to Dhritaraashtra after his question about "Nau dwar", after which Dhritarashtra instructs Sanjay to go ahead from that point.)



Krishna- Manushya ke bhramit hone ka kaaran yeh hai Parth, ki uska Agyaan uske Gyaan ko dhak deta hai. 

Aur jab Aatmagnyaan agnyaan ko nashta kar deta hai, to gyaan us Param Tatva ko Soorya ki bhaanti prakaashit kar deta hai. 

Aur gnyaani is nashwar jeevan hi me Param Satya ko praapt kar lete hain. Unhe janm par janm nahi lena padta. Wo isi nashwar jeevan me moksh ko praapt kar lete hain. To He Paarth! Yeh nashwar jeevan ati mahatvapoorna hai. 


Kyunki iske upraant tumhara aatma to avashya tumhare paas hoga, kintu tum nahi hoge. To is nashwar jeevankaal ko arthpoorn aur samaaj ke liye kalyaankari banao Paarth. Gyaan prakaash hai, to is prakaash ko praapt karo. Aur yadi tumne aisa kar liya, to in bhramo me bhatakte bach jaaoge, jinme aaj bhatak rahe ho. Aur yadi bhatakne se bach jaaoge Paarth, to tumhe shanti milegi. 


He Dhananjay! Shanti ka seedha maarg Mai hun. Jo mujhe har Yagya ka Lakshya, har Lok ka Swami, aur har Praani ka Hitaishi maante hain, we hi Shanti paate hain. 


Yadi tum mujhe apna Hitaishi samajhte ho Paarth to mera kaha maano aur yuddh karo. Kyunki yeh yuddh kiye bina tumhe shaanti nahi mil sakti. Apne Dharm se bhaagne ka maarg shanti ki prapti ka maarg nahi hai Paarth. Yeh yuddh tumhara Dharm hai. To apne is dharm ka paalan karo Paarth aur uske parinaam ke vishay me na socho. Kaun marega ya kaun jiyega yeh tumhari samasya nahi hai 



He Pandav log jise Sanyaas kehte hai usse tum Yog maano. Aur Sanshay, Dwesh, Akansha se mukt hoke yudh karo, kyuki inhe tyage bina to koi yogi ho hi nahi sakta. 




Uddhared aatmana atmanam naatmanam avasaadayet,
Aatmaiva hyaatmano bandhur aatmaiva ripur aatmanah.(5) 






Manushya ka yeh kartavya hai ki woh apna patan na hone de aur swayam hi apna uddhar kare. Manushya swayam apna Mitra bhi hai aur apna Shatru bhi, jisne apna Aham, apna Mann, apna Indriya ko apne vash mein kar liya ho, wo swayam hi apna Mitra hai, aur jo inke vash mein ho gaya Parth, wo swayam hi apna Shatru hai. 


Jo sheet kaal aur grishma kaal, sukh aur dukh, maan aur apmaan me shaant rahe aur apna santulan rakhhe, wo Jeetendriya Purush sadaiv Parmatma me leen rehta hai, kintu He Parth bahut khane wale ya bilkul hi na khanewale, adhik sone wale ya bilkul hi na sone wale ko yeh yog siddh nahi hota. Jeevan santulan ka naam hai Parth. Aur santulit dhang se jeene wale manushyo ka Yog uske dukho ko har leta hai. Jaise vayu rahit sthan par deepak ki jyoti nishchal rehti hai, waise hi Moh-rahit Yogi bhi nishchal rehta hai. Chanchal mann ko manmaani na karne do Parth, usse roko. Aur usse apne Aatma ka adheen banao – tumhari yehi uljhano ka yehi upchaar hai. 


Meri ore dekho Parth, meri ore dekho. Jisse har disha aur vastuon me kewal Mai hi dikhayi doon woh to kabhi bhatak hi nahi sakta. Jo mujhe nahi bhulta Parth, maI bhi usse nahi bhulta. Woh to sansarik jeevan vyatit karte hue bhi sansar se alag aur mere bheetar rehta hai. He Arjun, jo Yogi sabke sukh dukh ko apna sukh dukh maane – wohi Param Sreshth hai. 




Aatmaupamyena sarvatra samam pashyati yohrjuna,
Sukham va yadi va dukham sa yogi paramo matah.(32) 



Arjun– Kintu yog marg pe chalte chalet mann bhatak to sakta hai




Krishna – Bhatak kyun nahi sakta, avashya bhatak sakta hai. 




Arjun– Keshav, to phir Brahm ki prapti ke maarg me, is bhaktan ka parinaam kya hota hai? Bhatak jaane wala badal ke bhaanti chhinn bhinn hokar kahin nasth to nahi ho jata Keshav? 




Krishna – Wo chahe lok ho chahe parlok, kalyan kaari shubh karm karnewalo ki durgati to ho hi nahi sakti. He Kuntiputra, mujh me mann lagao - mujh par nirbhar ho kar Yog karo. Tumhe mera Sanshay-rahit Poorna Gyan mil jayega. 

He Dhananjay! Sabse bada Satya to mai hi hoon. Mai hi woh dhaga hoon, jis mein yeh saari prakriti manio ki bhanti piroyi hui hai. 
He Kauntey – Jal mein Ras main hoon, Surya aur Chandrama me Prakash main hoon. Aakash mei Shabd bhi mai hi hoon.


Mai hi Prithvi me Pavitra Sugandh hoon, Mai hi agni me Tej hoon, Praaniyon me Jeevan shakti mai hoon, Tapasviyon ka Tapp mai hoon.


Hey Paarth, praarambhik beej mai hoon, Buddhimaanon ki Buddhi mai, Tejasviyon ka Tej mai. Balwaanon me kaam rahit Ball bhi mai hi hoon, aur Praaniyon me Dharm ke virudh na jaane wala kaam bhi mai hi hoon. Mai Sab me hoon Paarth, kintu sab se Alag bhi hoon.


Mai Avinaashi hoon, mai Nirgun hoon. Hey Paarth, mai beete huye saare kaalon, is beette huye is kaal, aur aane wale saare kaalon ke saare praniyon ko jaanta hoon. Parantu mujhe koi nahi jaanta. Mai hi jagat ka Pita bhi hoon, aur Maata bhi, aur Poshak bhi. Mai hi Rigved hoon, aur mai hi Saamved, mai hi Swami hoon aur main hi Sharan, mai hi Srijan hoon, aur mai hi Vilopan.


Mai hi sabka Aadhaar hoon Paarth, mai hi Sab Kuchh hoon, Sab Kuchh. Greeshm bhi mai, aur Varsha bhi mai, aur He Paarth, mai hi sansaar ka Avinaashi Beej bhi hoon. Mai sabka atipriya Mitr hoon, kintu sabke liye Ek Jaisa hoon. Na koi mujhe priye hai, aur na hi apriye; parantu jo mujhe shraddha se poojte hain Mitr, we mujhme hai aur mai unme. 





Samohaham sarvabhuteshu na me dveshyohasti na priyah
Ye bhajanti tu mam bhaktya mayi te tesu chapyaham||9-29||
 




Arjun–   He Krishna, aap Parabrahm hai, aap Shaashwat hai, Divya Tatyagna hai, aap Ishwar hai, aap Ajanma hai. He Giridhar, kewal aap hi ko aapka Gyan hai, to He Yogeshwar, He Gyanmurti, ma aapko jaanu kaise, aapko pehchaanu kaise? Kripaya vistaar se bataiye, kripaya vistaar se mujhe bataiye Madhav. 




Krishna –   He Kurusreshth! Mere vistaar ka to koi ant hi nahi hai, phir bhi suno – main praniyo ke hriday mein sthith Aatma hoon –


Ahamaatma gudaakesha sarvabhutashayasthitah,
Ahamadishcha madhyam cha bhutanamanta eva cha.||10-20||






He Gudakesh, main hi Aarambh hoon, Madhya bhi aur Antim ke antim chodh bhi, main Aaditya me Vishnu hoon, Maruto me Marichi, Jyotiyo me Surya aur Nakshatra me Chandra hoon. 



Vedanaam saamavedohasmi devanaamasmi vaasavah,
Indriyanaam manashchasmi bhutanaamasmi chetana.||10-22||




Mai Vedo me Saam ved hoon, Devo me Indra hoon, indriyo me Mann hoon, aur Praniyo me Chetna hoon. 

Mai Rudra me Shankar hoon, Yaksha aur Rakshashon me Kuber hoon, Vasuyo me Agni hoon, aur Parvato me Sumeru hoon. 

Purohito me mai Brihaspati hoon, Senapatiyo me Kartikey aur Jalashayo me Mahasaagar.


Maharshiyo me ma Bhrigu hoon, Vaaniyo me Omkaar, Yagnyo me Jay yagna, aur Aurrigo me mai Himalay hoon . 


Mai Vriksho me Peepal hoon, aur Dev-Rishiyo me Narad hoon. Mai Gandharvo me Chitrarath hoon, aur siddho me Kapil muni. 


He Maharathi – mai Ashwo me amrit se utpann hone wala Uchhaishrava hoon, ma Gajo me Airavat hoon aur Manushyo me Narapati.


Mai Shastro me Vajra hon, Dhenuyo me Kaamdhenu, Janako me Kaamdev aur Naago me Sheshnaag hoon. 




Prahladashchasmi daityanaam kaalah kalayatamaham,
Mriganam cha mrigendrohaham vainateyashcha paksinaam.||10-30||






Mai Daityo me Prahlad hoon, Ganako me Kaal hoon, Vanacharo me Singha hoon, aur Pakshiyo me Vishnu baahan Garur hoon. 


Aur He Dhanurdhar, mai Shastra dhariyo me Ram hoon, Aksharo me Aakaar hoon, mai kabhi na samapt hone wala Samay hoon, mai chahumukhi Srashta hoon. 


Mai hi Mrityu hoon Paarth, aur mai hi un sab ka Aarambh hoon, jo aanewale kaalon me janm lene wale hai, aur abhi tak jinke aarambh ka aarambh bhi nahi hua hai. 





Mrityuh sarvaharashchahamudbhavahcha bhavishyatam,
Keertih shrirvakcha naarinaam smrtirmedha dhrtih ksama.||10-34||






Main Striyo me Kirti, Shri vak, Medha, Dhriti aur Kshama hoon, mai Rituo me Rituraaj hoon, mai Tejaswiyo ka Tej hoon, mai Gud hoon, mai Vijay hoon, mai Prayatna hoon.


Mai Vadavo me Vaasudev hoon, aur Pandavo me Arjun. Mai Muniyo me Vyas hoon, aur Kaviyo me Shukracharya. 




Yachchapi sarvabhutanam bijam tadahamarjuna,
Na tadasti vina yatsyanmaya bhutam characharam.||10-39||




Mai hi to Utpatti ka Beej hoon Parth, wo chahe Char ho chahe Achar, mere bin to ho hi nahi sakta. Mai Prano ka Pran , aur Jeevan ka Jeev hoon. 




Arjun –   He Kamalnayan, meri aankhe khul chuki hai. Duvidha aur aashanka ke badal chat chuke hai. Aapne jo kaha, wohi Satya hai. Aur uske atirikt koi Satya nahi. Kintu He Parameshwar, mai aapki Ishwariya Roop ka darshan karna chahta hoon. 


Krishna – He nishpaap Arjun, apni in aankho se tum mera wo swaroop nahi dekh sakte, iske liye tumhe Divya Drishti ki avashyakta hogi. 


Na tu mam shakyase drastumanenaiva svachakshusha,
Divyam dadami te chakshuh pashya me yogamaishvaram.||11-8||





(Now comes the the famous scene of Vishwa-roop Darshan .)



Arjun – 


Adrishtapurvam hrishitohasmi drashtva bhayena cha pravyathitam mano me,
Tadeva me darshaya deva rupam praseeda devesha jagannivasa.||11-45||




He Nath, pehle na dekhe hue, aap ke is adbhut Virat Roop ke darshan se mai harshit ho raha hoon, kintu mera chitt, bhay se vyakul ho raha hai. Is liye He Devesh, mujh par prasanna ho kar, apni usi Divya roopko phir se prakat kijiye. 




(Again we have Dritarashtra-Sanjay conversation here.) 

(Coming back to Geeta dialogues…)



Arjun- Kshama, kshama Prabhu, He Vishwaamurti, He Anand, He Narayan , He Dayasaagar, jaise Mitra Mitra ko, Pita Putra ko, aur Bhagwan apne Bhakt ko kshama karte hai Prabhu, waise hi aap mujhe kshama kijiye Prabhu, aap mujhe kshama kijiye. 




Krishna – He Kuntinandan, Mitra aur Mitra, Pita aur Putra , Bhakt aur Bhagwan ke beech kshama ka to koi sthan hi nahi hai. In samnmandho ka adhaar hai Sneh, Shradhha aur Bhakti. 


Mayyaveshya mano ye mam nityayukta upaasate,
Shraddhaya parayopetah te me yuktatama matah.||12-2||




Jo mera bhakt hai, jo mujh hi me dhyaan bhi lagata hai aur mann bhi, jo sadaiv mujh hi mein leen rehta hai, aur jo poori shradhha ke saath meri upasana karta hai, wohi uttam Yogi hai . 
Is liye, He Parth, meri Bhakti Shreshth hai. Jo bhakt hai, weh is sansar mein nahi ulachte. Kyunki He Parth- 



Urdhvamulamadhahshakhamashvattham prahuravyayam|
Chandamsi yasya parnaani yastam veda sa vedavit||15-1||






He Parth, yeh sansar to maano Peepal ka Vriksh hai, jiski jade upar ki ore hai aur shaakhaaye niche ki ore, Ved issi vriksh ke patte hai. Jo yeh jaanta hai, wo yeh samjho Parth ki vedo ka arth bhi jaanta hai. Is vriksh ki shaakhaaye upar niche saari ore phaili hui hai. Jinka pariposhan kiya hai prakriti ki teeno guyno ne – Sato gun, Rajo gun aur Tamo gun. Iski jade manushya samajh me bahut gehrai tak phaili hui hai. Iski vaastavik roop ki anubhuti sansar me sambhav nahi Parth. Kyunki yeh to koi dekh hi nahi sakta ki is vriksh ka aadi, ant aur adhhar kya aur kahan hai. 


Kintu manushya is sansar roopi vriksh ko Vairagya ki kulhari se kaat kar us Param Pad ko prapt kar sakta hai jahan pahoch kar usse phir lautna nahi padta. 


Aur He Parth, Vairagya 'Nihit Swarth ka Tyaag' ka naam hai. Is liye sochna ho to kewal mere vishay mein socho, poojna ho to kewal mujhe poojo, apne aap ko mujhe arpan kar do He Sarvasreshtha Dhanurdhar, mere sharan me aa jao. Mai tumhe Paap-rahit kar dunga. 



Manmana bhava madbhakto madyaji mam namaskuru|
Mamevaishyasi satyam te pratijane priyohasi me||18-65||


Sarvadharman parityajya maamekam sharanam vraja|
Aham tvam sarvapaapebhyo mokshyayishyami ma shuchah||18-66||





Mujhe hi me Mann lagao Parth, mere Bhakt ho jao aur mujhe Namaskar karo. Yadi tum aisa karoge to mai Pratigya karta hoon, ki tum 'Sampoorna Roop se Mujhe Prapt kar loge'. Saari Dharmo ko tyago Parth aur meri Sharan me aa jao. Mai tumhe saare Paapo se Mukt kar dunga. Is liye shok na karo He Dhananjay, shok na karo. 


He Priya, He Bhakt, mai hi Karm, Gyan, Yog aur Bhakti ka Param Bindu aur Charam Laksha hoon. Is liye yogi ki bhaanti Nishkaam Karm karo. Chinta na karo Parth, chinta na karo. Mujhe me vishwas rakhho. He Mahabaho, apna Gaandiv uthao aur yuddh karo.